Peşəkar Futbol Liqası və “Badamlı” şirkəti arasındakı əməkdaşlıq müqaviləsi yenilənib. Azərbaycan Premyer Liqasında 2023/2024 mövsümünün püşkatmasından əvvəl keçirilən tədbirdə Peşəkar Futbol Liqasının vitse-prezidenti Aslan Şahgəldiyev, media və marketinq direktoru Sənan Abdullayev, “Badamlı” şirkətinin direktor müavini Elbrus Novruzlu, PR və marketinq meneceri Elvin Babayev, qonaqlar və media nümayəndələri iştirak ediblər. Tədbiri giriş sözü ilə açan PFL-in media və marketinq direktoru Sənan Abdullayev “Badamlı” ilə əməkdaşlığın önəmindən danışıb. Ardınca vitse-prezident Aslan Şahgəldiyev müqavilə haqqında fikirlərini bildirib:

“Hər kəsi salamlayıram. Bilirsiniz ki, “Badamlı” şirkəti ilə bir ildir ki müqavilə imzalamışıq. “Badamlı” şirkətini xüsusi tanıtmağa ehtiyac  yoxdur, Azərbaycanın ən yaxşı şirkətlərindən biridir. Futbol idman marketinqində mühüm əhəmiyyət kəsb edir. İstənilən sahədə uğurlu olmaq üçün əsas məsələlərdən biri də maliyyədir. Bu anlaşma həm də qarşılıqlı güvənin, inamın təzahürüdür. Peşəkar Futbol Liqasının büdcəsinin formalaşmasında sponsorluq müqavilələri vacib rol oynayır. Buna görə də “Badamlı” şirkətinə tərəfdaşlığa görə təşəkkür edir, əməkdaşlığımızın uzun müddət səmərəli şəkildə davam edəcəyinə inandığımı bildirirəm.”

Ardınca “Badamlı” şirkətinin direktor müavini Elbrus Novruzlu müqavilə haqqında fikirlərini bölüşüb:
“Bütün tədbir iştirakçılarını salamlayıram. “Badamlı” mineral suları korporativ sosial məsuliyyət üzrə bir sıra sahələrə olduğu kimi, futbol sahəsinə də xüsusi qayğı göstərir. Bilirsiniz ki, Peşəkar Futbol Liqası ilə hələ 1 il öncə müqavilə imzalamışdıq. Əməkdaşlıq çərçivəsində “Badamlı” suları ilə təminatı həyata keçirdik və bundan qürur duyduq. Peşəkar Futbol Liqası ilə əməkdaşlığın verdiyi həyəcan, qürur və məmnunluq hissini yenidən yaşamaq üçün müqaviləni 1 il daha uzatdıq. Ümid edirik ki, bundan sonra da əməkdaşlıq hər iki tərəf üçün uğurlu olacaq.”

Ardınca tərəflər bir illik müqaviləyə imza ataraq bir-birilərinə xatirə hədiyyələri təqdim ediblər.