Topaz Premyer Liqasında aprel və may aylarının ən yaxşılarının mükafatlandırılması mərasimində iştirak edən Peşəkar Futbol Liqasının prezidenti Ramin Musayev tədbirdəki çıxışında demişdir: “Azərbaycan kubokunun final oyunu ilə əlaqədar olaraq “Topaz”la birgə aprel və may aylarının ən yaxşılarının mükafatlandırma mərəsiminin bu gün keçirməyi qərara aldıq. “Topaz”la əməkdaşlığımızın bir ili tamam oldu. Hamı gördü ki, “Topaz”ın Azərbaycan futboluna böyük faydası oldu. Ötən mövsümün oyunlarının televiziyada canlı yayımının sayı əvvəlki mövsümlərlə müqayisədə 2 dəfə artdı. Bu isə “Topaz”ın 2 ilin işini 6-7 ay ərzində görməsi deməkdir. Növbəti mövsüm daha çox oyun yayımlanacaq. “Topaz” hətta, I Divizion oyunlarının yayımında da köməyini əsirgəmədi. Bir sözlə, “Topaz”la əməkdaşlıqdan razıyıq”. 

Ramin Musayev gələcəkdə “Topaz”la yeni layihələr həyata keçirəcəklərini də bildirib. O, qeyd edib ki, KİV nümayəndələrinin də iştirakı ilə ölkə xaricində tədbirlərin təşkili nəzərdə tutulur. 

Daha sonra KİV nümayəndələrinin suallarını cavablandıran Ramin Musayev bunları bildirmişdir: “Növbəti mövsümdən keçiriləcək 10 komandadan ibarət 4 dövrəli sistemin tətbiqi klubların maddi durumları, sponsor problemi ilə bağlıdır. İki komandaya sponsor tapılsa, çempionat yenidən “altılıq” sistemi ilə keçiriləcək. Hələ püşkatma olmayıb, bunu edə bilərik. Klubların sponsor problemlərini nəzərə almaq lazımdır. Gəlin, azarkeşləri futboldan iyrəndirməyək. Milçəyi şişirdib, fil etməyək. 

Naxçıvanın “Araz” klubu I Divizionda oynamaqla bağlı bizə rəsmi müraciət etməyib. Ancaq I Divizionda iştirak edəcək 7-8 klub bizə rəsmi şəkildə Naxçıvana getməklə bağlı maddi çətinlik çəkdiklərini bildirib. Çempionatın medalçılarına verilən pul mükafatlarının ləğv olunması “Topaz”a yox, mənə veriləsi sualdır. Sponsorun verdiyi pulun hara xərclənəcəyi bizə aid məsələdir. Klublar həmin məbləğin 20 faizini siz jurnalistlərə versə, mən mükafatları yenidən bərpa edəcəyəm. Klublar cərimələrin 50-60 faizini verməyib. Türkiyə Superkuboku uğrunda “Qalatasaray” – “Fənərbaxça” matçının Bakıda baş tutmamağından biz daha çox itirdik. Ancaq, bildiyiniz kimi, növbəti mövsümdə çempionatımızda turların sayı çox olacaq. Türkiyə Superkubokunun keçiriləcəyi gün Topaz Premyer Liqasında turun oyunları keçiriləcək. Hətta, təqvimdə sıxlıq olduğundan, millimizin almaniyalı baş məşqçisi Berti Foqtsla razılaşmadığımız məqamlar var. Oyunlarımız Novruz bayramında düşəndə yerli klub rəhbərləri buna etiraz etmirlər. Ancaq başqa din mənsubları öz bayramlarına düşəndə, az qala bizi öldürürlər. Məgər İspaniyada, İngiltərədə bayramda futbol oynamırlar?”.