Bu gün Topaz Premyer Liqasının 2013/2014-cü il mövsümünun püşkatma mərasimi keçirildi. Tədbirdə iştirak edən Peşəkar Futbol Liqasının prezidenti Ramin Musayev yeni mövsümdə ölkə çempionatında olacaq yenilikləri tədbir iştirakçılarının diqqətinə çatdırdı: “İlk öncə Avroliqa təmsilçilərimizi təbrik edirəm. Yeni mövsümdə Topaz Premyer Liqasında dəyişikliklər olacaq. Yeni mövsumdən I Divizion komandalarının əsas heyətində 8 nəfər 21 yaş altı futbolçu iştirak etməlidir. Məşqçilərin bu oyunçuların hamısını oynada bilməsi üçün I Divizion oyunlarında 3 yox, 5 oyunçunun əvəzedilməsinə icazə veriləcək. Yeni mövsümdən etibarən Adidas şirkətinin istehsalı olan “Kafusa” (Cafusa) toplarından istifadə olunacaq. Hər bir komandanın oyun formalarında futbolçuların ad və ya soyadı qeyd olunacaq. Bəzi gərgin oyunlarda 6 hakimdən istifadə olunması üçün Hakimlər Komitəsinə müraciət edəcəyik. Növbəti mövsümdən I Diviziondan Premyer Liqaya bir komanda yüksələcək. Həmçinin, PFL tərəfindən verilmiş xüsusi lisenziyası olmayan klub nümayəndələri komandalarının oyunları zamanı texniki zonada əyləşə bilməyəcəklər”.

Daha sonra klub nümayəndələrinin iştirakı ilə Topaz Premyer Liqasının 2013/2014-cü il mövsümünün püşku atıldı. 03-04 avqust tarixlərində baş tutacaq I turun oyunlarında qarşılaşacaq komandalar aşağıdakı kimidir:

“Sumqayıt” – “Xəzər Lənkəran“
“İnter” – “Qarabağ”
“Bakı” - “Qəbələ“
“Neftçi“ – AZAL
“Simurq“ – “Rəvan“

Daha sonra Ramin Musayev KİV nümayəndələri maraqlandıran sualları cavablandırdı: “Avrokuboklarda çıxış edən klublarımıza böyük ümidlərim var. Məgər biz zəifik? Keçən il “Neftçi”nin qrup mərhələsinə düşəcəyini heç kəs gözləmirdi. Ancaq bu, oldu. Niyə də yenə olmasın? Mən demişəm ki, ən az 2 klubumuza böyük ümidlərim var. Onu da bildirmişdim ki, hər 3 klubumuz turnirdə ilk mərhələni adlayacaq. Yaxın 5 ildə futbolumuzda nə qədər böyük uğurların olacağını görəcəksiniz.  

“Azərbaycan Superkuboku uğrunda oyunun iştirakçıları olan “Neftçi” ilə “Xəzər Lənkəran”ın II təsnifat mərhələsində ilk matçlarının evdə olacağı halda, bu oyunu mütləq keçirməyi nəzərdə tutmuşduq. Ancaq “Neftçi”nin Çempionlar Liqasında Albaniyanın “Skenderbeu” ilə ilk matçı evdədirsə, “Xəzər Lənkəran” Avropa Liqasında Hayfa “Makkabi”si ilə ilk oyununu səfərdə keçirəcək. Kubok da, medallar da hazırdır. Ancaq avrokuboklarda ilk oyunların məkanı fərqli olduğundan, keçirə bilmədik. Tarixi indidən demək olmur, ancaq gözəl bir günə salacağıq”.

Ramin Musayev Superkubokun qış fasiləsində klubların təlim-məşq toplanışında olduğu Türkiyədə keçirilməyi ilə bağlı təklifə də münasibət bildirib: “Bu, gözəl fikirdir. Jurnalistləri apara bilərik, bəs azarkeşləri nə edək? Əslində, Superkubok oyununun Türkiyədə keçirilməsini “Xəzər Lənkəran”ın fəxri prezidenti Mübariz Mənsimov təklif etmişdi”.