Topaz Premyer Liqasının 15-ci turunda “İnter” səfərdə “Bakı”nı minimal hesabla məğlub edərək turnir cədvəlində 4-cü pilləyə yüksəldi - 1:0.

Kaxaber Sxadadze, “İnter” klubunun baş məşqçisi: “Hücumda oyunumuz alınmadı, ancaq müdafiənin yaxşı intizamlı oyunu sayəsində və əlimizə düşən epizodu qola çevirməklə bu oyunda qalib gəldik. Düzdür, səhvlərimiz çox oldu, lakin futbolçularım var gücləri ilə çıxış etdilər. Xarakter göstərdik və 3 xal qazandıq. Komandamı təbrik edirəm, irəliyə baxmalıyıq. “Neftçi” ilə yaxşı hücum futbolu oynadıq, bu gün isə hücumda oyunumuzun niyə alınmadığını müəyyənləşdirməliyik. Xahiş edirəm ki, bizim futbolçunu dirsəklə vurduqları epizodu aydınlaşdırsınlar. O, beyin silkələnməsi aldı. Heç vaxt futbolçumdan başqa futbolçunu sındırmasını istəməmişəm, bunu etmək olmaz. İnsanın əlindən çörəyini almaq olmaz. O, bunu öz sağlamlığı ilə qazanır. Ümid edirəm ki, İntizam Komitəsi bunu aydınlaşdıracaq. Bu hadisə mənim futbolçumun, oğlumun başına gəldiyi üçün demirəm. Bu – futboldur, boks deyil”.

Milinko Pantiç, “Bakı” klubunun baş məşqçisi: “Çoxlu qol epizodundan, penaltidən istifadə edə bilmədik, qapı tirinə dəyən topumuz var idi. Rəqib komandanı təbrik edirəm, düzdür, bu, göstərdiyi oyuna uyğun deyildi. Rəqib komanda sona qədər mübarizə apardı, onlar bu oyunda bizim səhvimizdən istifadə edib qol vumaq istəyirdilər və buna nail oldular. Top qapıya girməyəndə girmir. Növbəti oyun kubok oyunudur, “Sumqayıt”la oyuna kimi komandanı hazırlamağa çalışağacam. Rauf Əliyev penalti vurmaq üçün seçilmişdi, milli komandanın oyunçusudur. Çempionat uzun marafondur, may ayında görəcəyik ki, biz haradayıq. Bugünkü məğlubiyyət mənə çox təsir edir. “Neftçi” ilə oyunu yada salsaq, görərik ki, oyunda aparıcı tərəf biz idik, amma sonda məğlub olduq. Bizim komandada qol vurmaq çatışmır. Komandanın başına iyun ayında gəldim, seçilmiş futbolçular mənim seçimim deyil, komandaya hücümçu lazımdır. Yanvar ayında komandaya hücümçü dəvət edəcəyik. Komandamızda hər şey var, qol çatışmır”.