“Jurnalistlərin həmrəylik kuboku”nun final oyunundan sonra “Futbol+” qəzetinin futbol komandasının kapitanı Mahir Rüstəmli yarış haqqında fikirlərini bölüşüb.

Turnir haqqında və final oyunuhaqqındakı təəssüratlarınız necədir?

Final oyunu kifayət qədər maraqlı keçdi. Təəssüf ki, qrupda onlara qarşı göstərdiyimiz oyunu bu gün göstərə bilmədik. Yalnız ikinci hissədə istədiyimiz oyunu göstərə bildik və iki qol vurduq. Hesabı bərabərləşdirməyə bir qədər vaxt çatmadı. Həm də yorğunluq özünü göstərməyə başladı. Ötən oyunda qapıçımız qırmızı vərəqə aldığından bu gün çərçivəni Nihad qorudu, onun isə qapıçı kimi təcrübəsi yoxdur. Bu da oyunumuza təsir edən amillərdən oldu. Bütövlükdə həm turnir, həm də final oyunu maraqlı alındı. Turniri daha yaxşı təşkil etmək olardı. Təbii ki, mən burada PFL-dən daha çox birbaşa təşkilatçıları nəzərdə tuturam. Oyun zamanı həkimin olması, hakimlərin bir qədər də səviyyəli idarəçiliyi olsaydı daha yaxşı olardı. Amma PFL-in “Jurnalistlərin həmrəylik kuboku”na dəstək olması gözəl bir haldır. İnanıram ki, növbəti illərdə bunun davamı gələcək. Bizim heç bir oyunumuzda ciddi hakim qalmaqalları yaşanmayıb. Yarımfinal oyunundan əvvəlki gərginlik səbəbindən komandanı oyuna kökləməyə bilmədik. Ajiotaj oldu, çox təəssüfki, onun izləri bugünkü oyunda da qaldı. Psixoloji olaraq oyuna hazır deyildik, ona görə də ardıcıl qollar buraxdıq.

Final oyununda komandanızda çatışmayan nə idi?

Mənə elə gəlir ki, final oyunlarında bəxt də adamın tərəfində olmalıdır. 3-4 dəfə dirək rəqibi qoldan xilas elədi. Oyunun əvvəlində bir neçə əlverişli qol imkanını əldən qaçırdıq. Heç gözləmədiyimiz oyunçu öz qapımıza qol vurdu, yəni, bu, furboldankənar bəxt amilləri “İdman Azərbaycan”ın tərəfində oldu.

Mükafat kimi verilən pulu hara xərcləyəcəksiniz?

Çalışdığımız kollektivlə birgə Dünya azərbaycanlılarının həmrəylik gününü və Yeni ili qeyd edəcəyik.

Turnirin adı “Jurnalistlərin həmrəylik kuboku” adlanır. Sizcə, jurnalistlər həmrəy ola bildilərmi? 

Kimin kimə rəqib olmasından asılı olmayaraq, final oyunundan sonra hər kəs bir-birini alqışladı. Bu, özü də həmrəylik adına ciddi mesajdır.

Turnir zamanı belə bir şaiyə gəzirdi ki, təşkilatçılar “Futbol+”komandasını çempion etmək istəyir. Hətta digər komandalar deyirdilər ki, əgər çempionluq “Futbol+”a lazımdırsa,biz onlara hədiyyə edək. Bu şaiyələrə münasibətiniz necədir?

Biz belə şaiyələrə fikir vermirik. Turnirin 3-4 favoriti var idisə, biridə biz idik. Hər həftə “Ruslan-93” idman kompleksində futbol oynayırıq. “İdman Azərbaycan” bizə qrupda 2-4 hesabı ilə  uduzmuşdu. Onlarda bir qisas hissi var idi və bu da final oyununda özünü göstərdi. Digər söhbətlər isə yalnız şaiyədir.

Arzu edərdim ki, PFL belə nəcib tədbirlərə öz dəstəyini davam etdirsin. Turnirin təbliği ilə bağlı nəsə etmək olardı. Bizim qəzetin hər sayında turnir işıqlandırılırdı, digər KİV-lər də bunu etməli idilər. Final oyunu canlı yayımlana bilərdi, burada iştirakçıların qeyri-etik davranışı olmadı. Normal bir oyun getdi.