“Jurnalistlərin həmrəylik kuboku”nun qalibi “İdman Azərbaycan” kanalının futbol komandasının kapitanı Siyavuş Əliyev yarış haqqında fikirlərini bölüşüb. 

Turnir haqqında təəssüratlarınız?

Əla turnirdir, futbol elə bir idman növüdür ki, gərək orada həvəs olsun, stimul olsun. Mükafatın olması da oyunlara marağı və oyunların səviyyəsini qaldırmışdı, həmdə oyunlar özümüzə maraqlı idi. Məncə, pul mükafatını artırmaq da olardı. Final oyunu da maraqlı keçdi. Fikrimcə, oyuna baxanlar da razı qaldı və buradan xoş təəssüratlarla ayrıldılar. İstəyərdik ki, bu turnir həmişə keçirilsin.

Final oyunu haqqında nə düşünürsünüz?

Qrupda bu komandaya 2-4 hesabı ilə məğlub olmuşduq. Əsas məsələ qrupda məğlub olmaq deyil, finalda qələbə qazanmaqdır. Qrupda qələbə üçün oynamırdıq, onsuz da bilirdik ki, finalda bu komanda ilə görüşəcəyik. Ona görə də əsas gücümüzü finala saxlamışdıq.

Pul mükafatını necə xərcləyəcəksiniz?

Yeni il qabağı komanda ilə toplaşıb qələbəni qeyd edəcəyik. Burada olan komandaların əksəriyyəti istəyirdi ki, “İdman Azərbaycan”a qalib gəlsin, çünki, bizdə işçi sayı və seçim imkanı çoxdur. Bizim oyunçumuza qırmızı da verilib. Elə olub ki, rəqib oyuna 4 nəfərlə gəlib, biz də onlara güzəştə gedib 4 nəfərlə oynamışıq. Hakimlik yaxşı idi, amma bəzən, sanki, kimdənsə qorxurdular. Hakimlik edəndə qorxmaq lazım deyil. Turnirin adı “Jurnalistlərin həmrəylik kuboku” olsa da eyni sahədə çalışan adamlar həmrəy ola bilməzlər, xüsusən də jurnalistlər. Onlar daha çox rəqibdirlər.