Topaz Premyer Liqasının 21-ci turunda “Bakı” doğma meydanda “Neftçi” ilə qarşılaşdı. İkinci hissədə vurduğu iki qolla rəqibini məğıub edən “Bakı” paytaxt derbisindən qalib ayrıldı – 2:0.

Böyükağa Hacıyev, “Neftçi” klubunun baş məşqçisi: “Əsas heyətin 5-6 futbolçusunun oynamaması öz sözünü dedi. Erik Ramos mərkəzdə oynayanda daha rahat oluram, neçə ildir ki, özünü doğruldur. Rəşad Sadiqov oyunqurucu kimi yaxşıdır, bu gün isə rəqib hücumlarını dağıtmaq üçün fərqli mövqedə oynadı. Nə edək ki, Kanales kimi qol imkanlarından istifadə edən futbolçumuz yoxdur. Melvin Platyenin qol vurmasını istəyirdim, amma vura bilmədi. Qol epizodlarında yalnız çərçivəyə düşməyi lazım idi, bacarmadı”.

Milinko Pantiç, “Bakı” klubunun baş məşqçisi: “”Neftçi”ni məğlub etdikdən sonra hamımız sevincli olmalıyıq. Yaxşı oyun göstərdik. İlk hissənin əvvəlində rəqib hücuma atıldı. “Neftçi”nin bu qədər hücumameylli oynayacağını gözləmirdim. Fasilədə komandaya səbrlə oynamağı tapşırdım, qol vuracağıq dedim. İkinci hissədə fərqli oyun gördük, qalib gəldik. Bizim üçün çempionat indi başlayır. “Neftçi” ilə xal fərqimizi azaltdıq. Hər şey hələ qabaqdadır. “Xəzər Lənkəran”la oyuna yalnız 3 xal üçün çıxacağıq. Bu qələbə növbəti oyunlara köklənmək üçün bizə çox kömək edəcək. Hakimə meydanda kömək etmək lazımdır, futbolçulara hakimlə mübahisə etməməyi tapşırmışdım. Gözəl oyuna görə hakimləri də təbrik edirəm”.