Topaz Premyer Liqasının 24-cü turunda doğma meydanda AZAL-ı qəbul edən “Rəvan” rəqibini 1-0 hesabı ilə məğlub etdi. Xal ehtiyatını 14-ə çatdıran paytaxt klubu turnir cədvəlində son pilləni “Sumqayıt”a təhvil verdi.

Vaqif Sadıqov, AZAL klubunun baş məşqçisi: “Çox danışmaq istəmirəm, futbolda belə oyunlar da olur. Qapıçımız bir dəfə də olsun topun dalınca uzanmadı, amma məğlub olduq. Oyunumuzda olan səhvlərimizi düzəltməliyik. “Rəvan”ı qələbə ilə təbrik edirəm. Sona kimi mübarizə aparıb qələbə qazandılar. Əsas heyətimizdən 3 futbolçu yox idi, onlara bu gün ikisi də əlavə olundu. Gözlənilməyən nəticə oldu, oyuna bir daha təkrar baxmaq lazımdır. 6-cı dəfədir ki, layiq olmadığımız məğlubiyyəti alırıq. Kamal Bayramovun oyununu qeyd etməliyəm. O, Sapelanı layiqincə əvəz etdi”.

Güvenc Kurtar, “Rəvan” klubunun baş məşqçisi: “Bütün futbolçularımı təbrik edirəm. Yenə də oyunu 10 nəfərlə başa vurduq. Buna baxmayaraq, sona kimi qələbə qazanmağı düşündük. Cərimə zərbəsindən qol vurduq. Rəqib çox intizamlı oynayır, məğlub olduğu oyunlarda belə yaxşı oyun göstərir. Qalib gəlmək gözəl hissdir. Rəqibə demək olar ki, qol imkanı vermədik, bunu müsbət hal kimi dəyərlənidirirəm. Bundan sonrakı oyunlarda rəqiblərə qarşı daha rahat oynamalıyıq. Uzun zamandır qalib gələ bilməməyin yaratdığı psixoloji təsir var futbolçlarda. Yerli futbola dəstək verməyə çalışırıq. Heyətimizdə beş gənc futbolçu, bu gün onlardan üçünü oynatdıq. Çoxlu qol buraxdığımız üçün oyunu müdafiədən qururuq”.