Azərbaycan kubokunun ilk yarımfinalçısı “Rəvan” oldu. 1/4 finalın lk oyununda öz meydanında “Bakı” 0-1 hesabı ilə məğlub olan “sarı-qırmızılar” cavab qarşılaşmasında eyni hesabla qalib gəldi. Oyunsonrası penaltilər seriyasında isə “Rəvan” daha uğurlu oldu – 9:8.

Güvenc Kurtar, “Rəvan” klubunun baş məşqçisi: “Qalib gəldiyimiz üçün çox şadam. Bütün komandanı təbrik edirəm. İlk oyunda “Bakı”ya məğlub olmuşduq. Fikrimcə, həmin oyunda penaltimizi və rəqibə qırmızı vərəqə verilməmişdi. Futbolçularımı qələbəyə çox inandırdım, demək olar ki, optimal heyətlə meydana çıxdıq. Oyunsonrası penaltiləri də məşq etmişdik. Son 10 dəqiqəyə kimi riskə getmədik. Oyunda bir neçə mübahisəli epizod var idi. Buna baxmayaraq, qalib gəldiyimiz üçün şadıq, “Bakı” güclü komandadır. Biz ağıllı oynadıq, oyunsonrası penaltilərlə olsa belə mərhələni keçdik. Yeni futbolçuların komandaya uyğunlaşması üçün zamana ehtiyac var. Klubumuzun prezidentinə təşəkkür edirəm. Çox yaxşı rəhbərliyimiz var, bizə daima dəstək verirlər. İlk oyunda da qalib gələ bilərdik, biz yaxşı komandayıq”.

Milinko Pantiç, “Bakı” klubunun baş məşqçisi: “”Rəvan”ı qələbə ilə təbrik edirəm. Məğlub olduğumuzu qəbul etməliyəm. Rəqib son səfər oyununa əsas heyətin 10 futbolçusunu aparmamışdı. “Neftçi” ilə oyunda da eyni şeyi gözləyirəm. 120 dəqiqə ərzində rəqibin qapısına qol vura bilmədik və məğlub olduq. Rəqib isə əldə etdiyi imkandan maksimum yararlandı. Bəxtimiz də gətrmədi. Bəlkə də finalda oynamağa layiq deyildik. Bundan sonra bütün fikrimizi Premyer Liqaya yönləndirəcəyik, avrokuboklar uğrunda mübarizə aparacağıq. Məğlubiyyətə çox üzülürəm. Komandada bir problem var - hücumçunun olmaması. Son oyunların hamısında bu problemlə qarşılaşmışıq. Marius Penaya AZAL-la oyunda da şans verəcəm. Bugünkü hakimliyi şərh etmək istəmirəm”.