Topaz Premyer Liqasının 27-ci turunun açılış oyununda “Qəbələ” doğma meydanda “İnter”lə qarşılaşdı. Rəqibinə 1-4 hesabı ilə məğlub olan əyalət təmsilçisi turnir cədvəlində 5-ci pilləyə gerilədi.

Kaxaber Sxadadze, “İnter” klubunun baş məşqçisi: “Hamının bayramını təbrik edirəm, can sağlığı, xoşbəxtlik arzu edirəm. Bu cür qələbədən sonra oyunumuzu analiz edə bilməyəcəm. Daha çox emosiyalar üstündür. Futbolçularımı gözəl oyuna görə təbrik edirəm, çox qol vurduq. Bu oyunu tezliklə unudub qarşıdakı son mərhələyə hazırlaşmalıyıq. Turnir cədvəlində hansı mövqedə olacağımız qarşıdakı oyunlarda bilinəcək. Sabit komanda həmişə məqsədinə çatır. Biz də bu cür oyunla avrokuboklara düşməyə çalışmalıyıq. Rəqib “Neftçi” və “Qarabağ”a qarşı müxtəlif sistemlərlə oynamışdı. Biz də bunu nəzərə alıb oyunumuzu qurduq”.

Yuri Syomin, “Qəbələ” klubunun baş məşqçisi: “Nəticə qanunauyğundur, “İnter” bu gün bizdən üstün oynadı. Bunun  səbəblərindən biri əsas heyətdən bir neçə müdafiəçinin olmamasıdır. Bu dəfə rəqibə qarşı müdafiədə etibarlı oynaya bilmədik. Bundan əlavə “İnter” kubok oyunundan sonra fiziki baxımdan bizdən daha güclü oldu. Levinin daha öncə harada oynaması mənim üçün önəmli deyil. 0-1 hesabı ilə geri düşdükdən sonra hücumameylli oyunçunu meydana buraxdım. Bu nəticə ilə heç kim razı ola bilməz, nə mən, nə də azarkeşlər. Sabit çıxış etmirik, Kamran, Rafael və Nikola zədəlidir. Gənc futbolçulara şans verməli olduq. Nəticə qazanmaq üçün səbr etmək lazımdır. Əvəzetmədən oyuna daxil olan Leonardonun oyunu məni qane etmədiyi üçün onu əvəzlədim”.