Topaz Premyer Liqasının 28-ci turuna “Sumqayıt” – AZAL oyunu ilə start verildi. İlk hissədə hesabda geri düşən ev sahibi komanda əzmkar oyunla yekunda qələbəni bayram etdi – 2:1.

Tərlan Əhmədov, AZAL klubunun baş məşqçisi: “Komanda ikinci dövrədə ümumiyyətlə iki toplayıb. Çətin psixoloji durumdayıq, bundan çıxmaq lazımdır. Bir neçə futbolçuda istək hiss olunur, amma çoxu istəksiz oynayır. Bunun səbəbini araşdıracağıq. Komanda artıq uduzmağa alışır, əcnəbi futbolçular əvvəlki futbolu oynamırlar. İstək olmasa, rəqabətdə irəli gedə bilmərik. Görünür ki, bəzi futbolçular bu rəqabətə hazır deyil. Müdafiədən bu cür səhvləri gözləmirdim. Belə getsə, mövsümün sonunda futbolçuların çoxundan imtina olunacaq”.

Aqil Məmmədov, “Sumqayıt” klubunun baş məşqçisi: “Maraqlı oyun alındı. AZAL bizim üçün həmişə çətin rəqib olub. Komandaya qələbəyə görə təşəkkür edirəm, sona kimi oynadılar. Azarkeşlər də bizi tək buraxmadılar, komandaya  dəstək verdikəri üçün minnətdaram. Məğlub ola da bilərdik. Amma bu gün bizim qələbə istəyimiz daha çox idi”.