Topaz Premyer Liqasının 28-ci turunda “Bakı” doğma meydanda “Simurq”la qarşılaşdı. İlk hissəni hücumlarla başlayan və erkən iki qol vuran ev sahibi komanda ikinci hissəni azlıqda keçirsə də, qələbəni əldən vermədi – 2:1.

Georgi Çixradze, “Simurq” klubunun baş məşqçisi: “Oyuna pis başladıq. Çoxlu səhvlər buraxdıq, qapımızda ardıcıl iki qol gördük. Rəqib ikinci hissəni azlıqda keçirsə də, oyunun əvvəlində buraxdığımız səhvlər ucbatından qalib gələ bilmədik. İkinci hissədə özümüzə gəldik, qollardan birinin əvəzini çıxdıq. Lakin ardını gətirə bilmədik. Hər bir futbolçu səhv edə bilər”.

Milinko Pantiç, “Bakı” klubunun baş məşqçisi: “Qələbə qazandığımız üçün şadam. Komanda var gücünü ortaya qoydu. Çətin qələbə qazandıq. Meydanda və kənarda baş verənlər var ki, biz buna müdaxilə edə bilmirik. İlk hissədə iki qol vurduq, ikinci hissədə isə müdafiədən oynadlq. “Neftçi” ilə oyunda cəzalı duruma düşən Vüqar Mustafayev və Araujo Santos oynaya bilməyəcək. Bunların niyə baş verdiyini anlamıram. Ola bilsin ki, bu, belə olmalı idi. Bir tərəfdən yaxşıdır ki, “Xəzər Lənkəran”la oyunda iştirak edə biləcəklər. Bilmirəm niyə Ruben Qonzalezə də vərəqə göstərmədilər. Onun da 3 vərəqəsi var, cəza limitində idi. Sevinirəm ki, bu gün heyətdə 4 gənc futbolçu oynadı. Azərbaycan futboluna kömək etmək üçün gəlmişəm. Burda olduğum müddətdə gənc yerli fubtolçulara dəstək olacam. Vüqarı məcbur etsən də, danışan deyil. Onu meydandan niyə qovduqlarını anlamıram? Serb dilini anladığım üçün Draqan Çeranın da söydüyünü eşitdim. Hər söyüşə görə qırmızı vərəqə verəndə gərək meydanda oyunçu qalmasın. Rauf Əliyev məşqdə oyuna hazır olduğunu bildirmişdi. Zədə alması bizim üçün gözlənilməz oldu”.