Topaz Premyer Liqasının 28-ci turunda “Qarabağ” “Qəbələ” ilə qarşılaşdı. Rəqibini 3-0 hesabı ilə məğlub edən ağdamlılar çempionluq yolunda daha bir addım atdı.

Yuri Syomin, “Qəbələ” klubunun baş məşqçisi: “İki fərqli hissə izlədik. Hava şəraiti oynamaq üçün uyğun deyildi. İlk hissədə bərabər oyun getdi, ikinci hissənin əvvəlində isə buraxdığımız qol oyunumuza təsir etdi. Hakimlər Komitəsindən ikinci qolun necə vurulmasına baxmalarını xahiş edirəm. Yəqin ki, hərəkətdə olan topla oyunu başlamaq və oyundankənar vəziyyətdən qol vurmaq olmaz. Buna görə də oyunun hakimlərinə iradım var. Xüsusi ilə də yan xətt hakimlərindən narazıyam. Qarşıda, demək olar ki, bütün dövrə var, ölkə kubokunda yarımfinaldayıq. Hələ heç nə məlum deyil. May ayında mövsümə yekun vurulanda danışacağıq. “Qəbələ” hal-hazırda KİV-də çox müzakirə olunur. Hamı yalnız neqativ halları axtarır. Haqqımızda olmayan şeyləri yazırlar. Guya rəhbərlik mənə dəstək olmur. Rəhbərlik mənə tam dəstək verir. Təbii ki, bugünkü nəticə heç kimi qane edə bilməz. Əminəm ki, bunun öhdəsindən gələcəyik. Vəziyyətimiz çətin ola bilər, lakin bunun öhdəsindən gələcəyik. Komandada futbolçular arasında yaxşı münasibət var, heç bir problem yoxdur. Bəzən qeyri-obyektiv yazılar getdiyi üçün mətbuatla ünsiyyəyə qadağa qoyuruq. Ondansa “Qəbələ”nin oyunlarındakı hakimlikdən yazın”.

Qurban Qurbanov, “Qarabağ” klubunun baş məşqçisi: “Təbiətdə pis hava olmur, maraqlı oyun oldu, meydanda mübarizə gedirdi. Bizdə qələbə istəyi daha çox idi, vacib qələbə qazandıq. Azarkeşlərimizə təşəkkür edirəm, sona kimi bizi dəstəklədilər, biz də onları sevindirdik. Bizim çempionatda məğlub olduğumuz, heç0heçə etdiyimiz oyunlar da olub. Bəzən sonuncu pillələrdəki komandalara qarşı xal itkiləri ilə üzləşə bilərik. Hər bir rəqib bizdən xal ala bilər. Futboldur, sürprizlər ola bilər. Hər qələbədən sonra rəqiblər bizə qarşı daha ciddi oynayır. Bütün rəqiblərə hörmətlə yanaşırıq”.