Topaz Premyer Liqasının 30-cu turunda “Xəzər Lənkəran”ı qəbul edən “Bakı” ilk hissəsini 0-2 hesabı ilə məğlub başa vursa da, ikinci hissədə iki qol vuraraq 2-2 hesablı bərabərliyə nail oldu.

Mustafa Denizli, “Xəzər Lənkəran” klubunun baş məşqçisi: “Oyun azarkeşlərə zövq verdi. Matçda futbol adına hər şey var idi. 3 xalı qazana bilmədik. Premyer Liqada Avropa Liqasına vəsiqə qazanmaq üçün şansımız olmadığı üçün fikrimizi toparlaya bilmirik. Kubokda daha uğurlu olmaq üçün bugünkü oyun bizə bir dərs oldu. Premyer Liqa bizim üçün hal-hazırda ikinci planda olduğu üçün əsas heyətin bəzi futbolçularına istirahət verməyim adi haldır”.

Milinko Pantiç, “Bakı” klubunun baş məşqçisi: “Çətin və mübarizə ilə bol bir oyun oldu. Bir neçə futbolçumuz bu gün meydana çıxa bilmədi. Rəqibimiz güclü idi, ilk dəqiqələrdə qapımızda qol gördük. Bu da rəqib komandaya üstünlük verdi. “Xəzər Lənkəran”ın cərimə zərbələrini çox yaxşı yerinə yetirməsini futbolçularıma demişdim. İlk hissəni 0-2 hesabı ilə geridə olsaq da, fasilədə futbolçularıma tövsiyyələrimi verdim. İkinci hissədə daha həvəsli oynadıq, komandam qələbəyə layiq idi. Hücumda çatışmazlıqlarımız var, iki gənc futbolçuya bu gün şans verdim. “Neftçi” ilə oyunda top rəqib futbolçunun əlinə dəymişdi, hakim isə 11 metrlik cərimə zərbəsi təyin etməmişdi. Ona görə bu haqda danışmışdım. Klubumuzun prezidentinə söz vermişəm, hakimlikdən danışmayacam. Hakim də insandır, səhv edə bilər. İlk üçlüyə düşmək üçün sona kimi mübarizə aparacağıq”.