Topaz Premyer Liqasının 35-ci turunda “Neftçi” “Rəvan”ı qəbul etdi. Hesabda geri düşməsinə baxmayaraq, “Neftçi” əzmkar oyunla qələbə qazandı – 2:1. Bu nəticədən sonra “ağ-qaralar” turnir cədvəlində üçüncü pilləyə yüksəldi.

Güvenc Kurtar, “Rəvan” klubunun baş məşqçisi: “Son oyunlarda bəxtimiz gətirmir, bu gün də elə oldu. Oyunda Orxan Lalayev zədələndi, bizim üçün çox ciddi itkidir. Zədəli futbolçularımızın sayı çoxdur. Bu oyunda Oke Akpoveta olsa idi daha yaxşı olardı, əsl ona görə oyun idi. İkinci hissənin sonlarına yaxın bir neçə qol imkanı əldə etdik. Sürətli futbolçuya ehtyacımız var idi. Oke olsa idi mütləq qələbə qazana bilərdik. İkinci hissənin ilk 15-20 dəqiqəsində “Neftçi” üstün oynadı, bir neçə qol imkanı əldə etdi. Bizim də qol vurmaq üçün imkanlarımız oldu. Ayaz qapıçını keçsə də, boş qapıya qolu vura bilmədi. Künc zərbəsindən sonra qapımızdan qol buraxdıq. “Neftçi”ni təbrik edirəm. Mübarizəmiz son turda da davam edəcək. “Bakı”nı səfərdə məğlub etmişdik. Bu dəfə öz meydanımızda qarşılaşacağıq. Heyətimizdə zədəli futbolçuların olması məni narahat edir. Qapıçımız da bu gün zədələndi. 14-15 futbolçumuz var, 11 nəfər tapsaq gələn tur oyuna çıxa bilərik. Kubok oyunlarına üstünlük vermişdik. Futbolda bir futbolçu çox şeyi dəyişə bilər. Heyətdə itkilərin olması oyunumuza təsir edir. İkinci hissədə oyunu qazana bilərdik. Hakimliyin səviyyəsini bəyənmədim. Bütün mübarizələrdə bizim əleyhimizə qərar verdi, bir neçə epizodda rəqibə sarı vərəqə göstərmədi”.

Böyükağa Hacıyev, “Neftçi” klubunun baş məşqçisi: “”Rəvan”la qarışıq oyun alındı. Çoxsaylı qol imkanları yaratmağımıza baxmayaraq, həlledici vuruş çatışmırdı. Rəqib iki hissə ərzində qapımıza bir zərbə vurdu, o da qol oldu. Oyunun gərgin keçəcəyini gözləyirdim. Medallar uğrunda qızğın mübarizə getdiyi kimi Premyer Liqada qalmaq üçün də “Sumqayıt”la “Rəvan” mübarizə aparır. Yaxşı ki, son anda futbolçular özlərində güc tapıb son nöqtəni qoya bildilər. Artıq çempionatın sonuna bir tur qalıb. “Simurq”a qarşı oyun da çox çətin keçəcək. Çünki, üçüncü yerin sahibi məhz bu oyunlarda müəyyən olunacaq. “Sumqayıt” çempionu məğlub etdi, bu, futbolda olan haldır”.