Bu gün AFFA-nın inzibati binasında Azərbaycan kubokunun 2015/2016-cı illər mövsümünün püşkatma mərasimi keçirildi.  Tədbirdə Peşəkar Futbol Liqasının prezidenti Ramin Musayevlə yanaşı,  iştirakçı klub nümayəndələri və jurnalistlər iştirak etdilər.

Ramin Musayev tədbir zamanı çıxış edərək, bir sıra məsələlərə aydınlıq gətirdi: “Hər birinizi salamlayıram, püşkatma münasibəti ilə sizi təbrik edirəm. Çalışacağıq ki, kubok oyunlarında problemlər yaşanmasın. Ötənilki final oyununu yaxşı təşkil elədik və heç bir problem olmadı. Klub rəsmiləri tərəfindən hər hansı bir narazılıq eşitmədik.
Bəzi yerlərdə yazılır ki, çempionat oyunlarında hakimlərə göstərişlər verilir. Bütün bunlar yalan söhbətlərdir. Belə bir şey olmayıb, ola da bilməz. Sadəcə, qəbul etmək lazımdır ki, insan səhv edə bilər. Hakim də insandır və səhv etməsi mümkündür.  Əsas məsələ odur ki, qərəz yoxdur. Bir neçə gün öncə hakimlərlə görüşdük, 3 saatdan artıq müzakirələr apardıq. Hakimlər danışan zaman fikirlər haçalandı. Burada oturanların bir qismi futbol oynayıb,  hazırda isə futbol sahəsində çalışırsınız. Bilirsiniz ki, hakim ani qərar verir. Biz isə həmin epizodu monitor qarşısında oturub 10 dəfə izləyirik. Epizodu böyütmək, eləcə də ona başqa tərəfdən baxmaq imkanımız var. Hakim isə belə bir imkana malik deyil. Gəlin olmayan məqamları müzakirə etməyək, reallıqlardan bəhs edək. Deyirlər ki, “Qarabağ”a kömək edirlər. “Qarabağ”a heç kimin köməyi lazım deyil. Televiziya verilişlərində hakim səhvlərindən danışılır. Yaxşı mütəxəssissənsə baş məşqçinin səhvindən danış, futbolçunun səhvindən danış. Bizim əsas məqsədimiz ədalətli çempionat keçirməkdir, başqa məqsədimiz yoxdur”.

Püşkatma mərasimindən sonra PFL prezidenti Ramin Musayev jurnalistlərin suallarını da cavablandırdı. Kubok sponsorluğu yayımı ilə bağlı suala R. Musayev belə cavab verdi: “Bu il kubok üçün sponsor axtarmadıq. Kubokun oyunlarını da CBC yayımlayacaq. Çünki bu kanalın yayımından həm azarkeşlər, həm klub nümayəndələri, ümumilikdə futbol ictimaiyyəti razıdır. İnşallah, I Divizion oyunlarının da yayımına ümid edirik. Bizim çempionat, futbolçuların oyunu heç də zəif deyil. Sadəcə, bunu göstərmək lazım idi. CBC telekanalının yayımından sonra buna bir daha şahid olduq”.

Rəhbər şəxs “Qarabağ”ın baş məşqçisi Qurban Qurbanovun məlum penalti qərarına da münasibət bildirdi: “Həmin epizodun müzakirəsi aparılan zaman müxtəlif fikirlər səsləndi. Hakimlərin yarısı bir , digər yarısı başqa bir fikir söylədi. Məncə, Qurban Qurbanovun "penaltini vurmayın" qərarı sadəcə onun insanlığından irəli gəlir. Hər kəs bilir ki biz Qurban Qurbanovla ailəvi dostuq, bunu gizlətmirəm. Onun övladları mənə baba deyirlər, amma bunun işə heç bir aidiyyəti yoxdur. Dərindən fikirləşsək, Qurban Qurbanovun düzgün addım atdığını deməliyəm”.